အမေရိကန်ကြောင့် လက်ပ်တော့ အသစ် မိတ်ဆက်မှုကို ဖျက်သိမ်းမယ့် Huawei

Huawei က ဒီတစ်ပတ်ထဲမှာ ရှန်ဟိုင်းတွင် ကျင်းပမယ့် CES Asia 2019 နည်းပညာ ပြပွဲမှာ MateBook Laptop အသစ် ကြေညာမှုကို ဖျက်သိမ်းမယ်လို့ Ars Technica က သတင်းပေးထားပါတယ်။ အမေရိကန်ရဲ့ စီးပွားရေး ပိတ်ဆို့မှုများကြောင့် ဖြစ်ပါတယ်။ CNBC ရဲ့ အဆိုအရ Huawei Consumer Division မှ စီအီးအို ရစ်ချတ်ယူ က အမေရိကန်ရဲ့ ပိတ်ဆို့မှုကြောင့် ပီစီများ မထုတ်လုပ်နိုင်တော့ဘူးလို့ ပြောကြောင်း သိရပါတယ်။

စီအီးအိုက အမေရိကန်ရဲ့ ပိတ်ပင်မှု ကာလဘယ်လောက်ကြာမယ်ဆိုတဲ့ အပေါ် မူတည်ပြီးမှ လက်ပ်တော့များကို ဆက်လက်ထုတ်လုပ်ရောင်းချမယ်လို့ ပြောတယ်လို့ သိရပါတယ်။ လက်ပ်တော့များရဲ့ ဝင်ငွေဟာ ဟွာဝေးရဲ့ Consumer Electronics လုပ်ငန်းမှ ဝင်ငွေ အားလုံးရဲ့ အနည်းငယ်သာ ရှိပါတယ်။ ဒါပေမယ့် ဟွာဝေးဟာ ၂၀၁၉ ခုနှစ်မှာ ပီစီ လုပ်ငန်းကနေ အမြတ်များစွာ ရဖို့ ရည်ရွယ်ထားတာပါ။

အမေရိကန်ရဲ့ စီးပွားရေး ပိတ်ပင်မှုကြောင့် ဟွာဝေးဟာ အမေရိကန် ကုမ္ပဏီများထံမှ နည်းပညာများကို ဝယ်ယူလို့ မရတော့ပါဘူး။ ဟွာဝေးဟာ နှစ်စဉ် Semiconductors များကို ဒေါ်လာ ၂၀ ဘီလီယမ်ဖိုး ဝယ်ယူလေ့ရှိပါတယ်။ အများစုက အမေရိကန် ကုမ္ပဏီများထံကပါ။ Intel, ARM , Qualcomm , Broadcom တို့က ဟွာဝေးအား သူတို့ရဲ့ ချစ်ပ်များကို မရောင်းတော့ပါဘူး။

ဟွာဝေးဟာ စမတ်ဖုန်း ပရော်ဆက်ဆာများကို ကိုယ်တိုင် ထုတ်လုပ်တဲ့ အတွက် သူ့ရဲ့ စမတ်ဖုန်း စီးပွားရေးကိုတော့ မထိခိုက်ပါဘူး။ ဒါပေမယ့် ဂူဂယ်လ်ရဲ့ အန်းဒရွိုက် မောင်းနှင်စနစ်ကိုတော့ အသုံးပြုလို့ မရတော့ပါဘူး။ ဟွာဝေးကလည်း သူ့ကိုယ်ပိုင် OS ကို ဖြန့်ချီပေးမယ့် သတင်းများလည်း ထွက်နေပါတယ်။

Ref : gizmodo

အမေရိကန်ကြောင့် လက်ပ်တော့ အသစ် မိတ်ဆက်မှုကို ဖျက်သိမ်းမယ့် Huawei

%d bloggers like this: