Cloud Storage များစွာက ဖိုင်များကို တစ်နေရာထဲကနေ စီမံခန့်ခွဲနိုင်မယ့် Unclouded

စမတ်ဖုန်းများမှ ဓါတ်ပုံ၊ ဗီဒီယိုနဲ့ အရေးကြီးဖိုင်များ ပျက်ဆီး၊ ပျောက်ဆုံးသွားရင် ဒုက္ခ မရောက်စေဖို့ Backup လုပ်ထားသင့်ပါတယ်။ Backup လုပ်တဲ့ နေရာမှာလည်း ပီစီများမှာသာမကဘဲ Cloud Storage ဝန်ဆောင်မှုများမှာ သိမ်းဆည်းနိုင်ပါတယ်။ Cloud Storage ဝန်ဆောင်မှုများဟာ များပြားလာတဲ့ အတွက် ရွေးချယ်စရာတွေများစွာ ရှိလာပါတယ်။ Cloud Storage မှာ ဖိုင်များ သိမ်းဆည်းထားသူများအနေနဲ့လည်း ဝန်ဆောင်မှုတစ်ခုတည်းမှာသာမကဘဲ ဝန်ဆောင်မှုများစွာကို အသုံးပြုကြမယ်လို့ ယုံကြည်ပါတယ်။ ဒီလို Cloud Storage ဝန်ဆောင်မှုများစွာကို အသုံးပြုသူများအတွက် နေရာများစွာမှ ဖိုင်များကို စီမံခန့်ခွဲဖို့ ခက်ခဲလာပါတယ်။ ဒီအခက်အခဲကို ဖြေရှင်းပေးနိုင်တာက Unclouded – Cloud Manager ဖြစ်ပါတယ်။ Unclouded က Dropbox , Google Drive , OneDrive , BOX , MEGA စတဲ့ နာမည်ကြီး ဝန်ဆောင်မှု ငါးခုမှ ဖိုင်များကို တစ်နေရာတည်းကနေ စီမံခန့်ခွဲပေးနိုင်ပါတယ်။ ဝန်ဆောင်မှုတစ်ခုချင်းစီမှာ ရရှိတဲ့ ပမာဏနဲ့ အသုံးပြုထားတဲ့ ပမာဏ၊ ကျန်ရှိနေသေးတဲ့ ပမာဏတို့ကို ခွဲခြားပြသပေးနိုင်ပါတယ်။ ဖိုင်အမျိုးအစားအလိုက် ဖိုင်များကို ခွဲခြားပြသပေးထားတဲ့အတွက် ရှာဖွေရတာလွယ်ကူပါတယ်။ ဒါ့အပြင် တူနေတဲ့ ဖိုင်များကို ရှာဖွေပေးနိုင်တဲ့အတွက် Storage ကို သက်သာစေမှာပါ။

App ကို ပထမဆုံးအကြိမ်ဖွင့်ရင် စွမ်းဆောင်ချက်များကို ပြသပေးမှာဖြစ်ပါတယ်။ ညာဘက်မှ ဘယ်ဘက်သို့ ပွတ်ဆွဲပြီး ကြည့်ရှုနိုင်ပါတယ်။ နောက်ဆုံး စကရင်မှာတော့ Get Started ကို နှိပ်ပါ။ နောက်အဆင့်မှာတော့ Cloud Storage ဝန်ဆောင်မှုငါးခုကို ပြသပေးမှာ ဖြစ်ပြီး နှစ်သက်ရာများကို Unclouded နဲ့ အရင်ဆုံး ချိတ်ဆက်ပေးရမှာဖြစ်ပါတယ်။ ( Cloud ဝန်ဆောင်မှုများရဲ့ အောက်မှာတော့ သင့်ဖုန်းရဲ့ Storage ကို စီမံခန့်ခွဲနိုင်တဲ့ ရွေးချယ်မှုလည်း ပါရှိပါတယ်။ ) ဥပမာအားဖြင့် Google Drive ကို နှိပ်ရင် သင့်ဖုန်းမှ Google Account များကို ပြသပေးမှာ ဖြစ်ပြီး နှစ်သက်ရာအကောင့်နဲ့ ချိတ်ဆက်နိုင်ပါတယ်။

ချိတ်ဆက်ပြီးရင်တော့ သင့်ရဲ့ Google Drive မှ ဖိုင်များကို စီမံခန့်ခွဲနိုင်ပါပြီ။ Menu မှာ ကဏ္ဍများစွာပါရှိတာကိုတွေ့ရမှာ ဖြစ်ပါတယ်။

Overview ကို နှိပ်ရင် ဖိုင်၊ ဖိုဒါအရေအတွက်နဲ့ စုစုပေါင်းအရေအတွက်တို့ကို ပြသပေးထားပါတယ်။ အောက်မှာတော့ အသုံးပြုထားတဲ့ ပမာဏနဲ့ ကျန်ရှိတဲ့ ပမာဏကို ရာခိုင်နှုန်းနဲ့တကွဖော်ပြထားပါတယ်။ စက်ဝိုင်းခလုတ်ကို နှိပ်ရင် ကျန်ရှိတဲ့ ပမာဏကို ပြောင်းလဲပြသပေးမှာပါ။
Menu ကနေ Explorer ထဲသွားရင် သင့်ဖိုင်များကို စီမံခန့်ခွဲနိုင်မှာပါ။ ဖိုင်တစ်ခုကို ဖိ၍ ရွေးချယ်ပြီးရင် ညာဘက်အပေါ်ထောင့်မှ ခလုတ်ကို နှိပ်ခြင်းဖြင့် ဖိုင်ကို ဖုန်းသို့ ဒေါင်းလုပ်လုပ်နိုင်သလို အခြား ဝန်ဆောင်မှုများနဲ့ Apps များထံပေးပို့နိုင်ပါတယ်။ နေရာပြောင်းရွှေ့ခြင်းနဲ့ အမည်ပြောင်းခြင်းတို့ကိုလည်း ပြုလုပ်နိုင်ပါတယ်။
Menu ကနေ Categories ထဲဝင်ကြည့်ရင် Images, Video, Documents စသဖြင့် ကဏ္ဍများနဲ့ ဖိုင်များကို ခွဲခြားပေးထားတဲ့အတွက် ဖိုင်များကို ရှာဖွေရာမှာ လွယ်ကူပါတယ်။

Menu ကနေ Last Modified ထဲသွားရင် ဖိုင်များကို နောက်ဆုံး ပြုပြင်ထားတဲ့ အချိန်ကို ပြသပေးမှာ ဖြစ်ပါတယ်။ Duplicates ထဲသွားရင်တော့ တူညီနေတဲ့ ဖိုင်များကို ရှာဖွေပေးမှာ ဖြစ်ပြီး ပွားနေတဲ့ ဖိုင်များကို ဖျက်ခြင်းဖြင့် Storage နေရာလွတ်များ ရရှိအောင် ပြုလုပ်ပေးနိုင်ပါတယ်။ Menu ကနေ All Files ထဲသွားရင်တော့ ဖိုဒါများကို မပြသတော့ဘဲ ဖိုင်များကိုသာ ပြသပေးမှာ ဖြစ်ပါတယ်။ Trash ထဲမှာတော့ ဖျက်ထားတဲ့ ဖိုင်များကို ပြသပေးမှာ ဖြစ်ပြီး မလိုအပ်တော့ရင် အပြီးတိုင် ဖျက်ပစ်နိုင်ပါတယ်။

Menu ကနေ Settings ထဲသွားရင် အလင်းရောင်နည်းတဲ့ နေရာများမှာ ကြည့်ရှုလို့ အဆင်ပြေစေဖို့နဲ့ AMOLED Display များမှာ ဘက်ထရီသက်သာစေမယ့် Dark Theme ကို အသုံးပြုနိုင်မှာ ဖြစ်ပေမယ့် အခမဲ့ အသုံးပြုသူများအတွက် မဟုတ်ဘဲ အခပေး အသုံးပြုသူများအတွက်သာ ဖြစ်ပါတယ်။ အဲဒီလိုပဲ Unclouded ကို PIN , Password , Pattern များဖြင့် ကာကွယ်ထားနိုင်တဲ့ Screen Lock စွမ်းဆောင်ချက်ကိုလည်း အခပေး အသုံးပြုသူများကသာ အသုံးပြုနိုင်မှာ ဖြစ်ပါတယ်။

Unclouded မှာ နောက်ထပ် Cloud Storage ဝန်ဆောင်မှုတစ်ခု ထပ်ထည့်ဖို့အတွက် Menu မှ မျှားကို နှိပ်ရမှာ ဖြစ်ပါတယ်။ အခမဲ့ အသုံးပြုသူများက အများဆုံး ဝန်ဆောင်မှုနှစ်ခုသာ ထည့်သွင်းနိုင်ပြီး အခပေး အသုံးပြုသူများက အကန့်အသတ်မရှိပါဘူး။

Unclouded ဟာ Cloud Storage ဝန်ဆောင်မှုများကို အသုံးပြုနေသူများအတွက် တစ်နေရာတည်းကနေ ဝန်ဆောင်မှုများစွာမှ ဖိုင်များကို စီမံခန့်ခွဲနိုင်တဲ့အတွက် အလွန်အသုံးဝင်ပါတယ်။ သူ့ရဲ့ ဖိုင်အရွယ်အစားဟာ 10 MB ရှိပြီး Android 4.1 နဲ့ သူ့အထက်မှာ အသုံးပြုနိုင်ပါတယ်။

Download

Cloud Storage များစွာက ဖိုင်များကို တစ်နေရာထဲကနေ စီမံခန့်ခွဲနိုင်မယ့် Unclouded

%d bloggers like this: