အင်တာနက်လိုင်းမရှိလည်း အင်တာနက်သုံးနိုင်မယ့် တစ်ကိုယ်ရည်ကွန်ပြူတာအသစ်တစ်မျိုး ပေါ်ထွက်လာ

endless_mini_screenshot

အမေရိကန်နိုင်ငံ၊ ဆန်ဖရန်စစ္စကိုအခြေစိုက်၊ ကုမ္ပဏီအသစ်တစ်ခုဖြစ်တဲ့ Endless ကုမ္ပဏီဟာ စမတ်ဖုန်းတွေ၊ တက်ဘလက်တွေကြီးစိုးနေတဲ့ ဒီဘက်ခေတ်ထဲကို သမားရိုးကျမဟုတ်တဲ့တစ်ကိုယ်ရည်ကွန်ပြူတာ (PC) တစ်မျိုးနဲ့စတင်ဝင်ရောက်လာပါတယ်။

လတ်စ်ဗေးဂတ်စ်မြို့မှာကျင်းပခဲ့တဲ့ အီလက်ထရောနစ်ပစ္စည်းပြပွဲ (CES) မှာ ကုမ္ပဏီဟာ ဂရိတ်ဖရုသီးအရွယ်အစားလောက်သာရှိတဲ့ စက်လုံးပုံစံ စားပွဲတင်ကွန်ပြူတာတစ်လုံးကို စတင်မိတ်ဆက်ပြသခဲ့ပါတယ်။

Endless Mini လို့ခေါ်တဲ့ အဆိုပါကွန်ပြူတာရဲ့ ဆန်းသစ်တဲ့စွမ်းရည်ကတော့ ယင်းရဲ့ hard drive ထဲမှာ အဓိကဝက်ဘ်ဆိုဒ်ကြီးတွေကို တစ်ပါတည်းထည့်သိမ်းဆည်းထားတာမို့အင်တာနက်ကွန်နက်ရှင်မလိုအပ်ဘဲ ဝက်ဘ်ဆိုဒ်တွေ ဝင်ကြည့်နိုင်ခြင်းဖြစ်ပါတယ်။ ဒီ့အပြင်ဈေးနှုန်းကလည်း ၇၉ ဒေါ်လာသာရှိတဲ့အတွက်၊ ပိုက်ဆံမတတ်နိုင်သူတွေအနေနဲ့နောက်ဆုံးပေါ်ကွန်ပြူတာတစ်လုံး ကိုင်နိုင်တော့မှာဖြစ်ပါတယ်။

“ ကမ္ဘာမှာကွန်ပြုတာမရှိသေးသူတွေ သန်းထောင်ပေါင်းများစွာရှိနေတာက တော်တော်စိတ်မကောင်းဖြစ်စရာပါ။ လူတိုင်းကွန်ပြူတာကိုင်နိုင်ဖို့ ကျွန်တော်တို့အထိရောက်ဆုံးလုပ်နိုင်တာကတော့ ဈေးကိုလျှော့ပေးတာပဲဖြစ်ပါတယ်။ နောက်ထပ် ဒုတိယမြောက်အထိရောက်ဆုံး ကျွန်တော်တို့ စွမ်းဆောင်ပေးနိုင်တာက အင်တာနက်လိုင်းမရတာကို ဖြေရှင်းပေးနိုင်ဖို့ပါ” လို့ Endless ကုမ္ပဏီရဲ့ CEO Matt Dalio က ပြောကြားခဲ့ပါတယ်။

ယခု Endless Mini ကွန်ပြူတာမှာ Wikipedia စွယ်စုံကျမ်းနဲ့Khan Academy က ပညာရေးဆိုင်ရာအချက်အလက်၊ဆောင်းပါးတွေ အစရှိတဲ့ သတင်းအချက်အလက်ပေါင်း ၆၅၀ မီဂါဘိုက် ကြိုတင်ထည့်သွင်ပေးထားပြီး အင်တာနက်လိုင်းမလိုဘဲ ရှာဖွေလေ့လာနိုင်မှာဖြစ်ပါတယ်။

ကွန်ပြူတာကို အင်တာနက်နဲ့ချိတ်ဆက်ပေးလိုက်ရင်၊ နောက်ဆုံးထွက် ဆောင်းပါး၊အချက်အလက်တွေကို အလိုအလျောက်ဒေါင်းလုဒ်လုပ်ပေးမှာဖြစ်ပြီး offline ဖြစ်သွားရင်လည်း ပြန်လည် ဖတ်ရှုနိုင်မှာဖြစ်ပါတယ်။

CEO Dalio ရဲ့ ပြောကြားချက်အရ ကုမ္ပဏီဟာ ၇၉ ဒေါ်လာတန်ကွန်ပြူတာကနေ အမြတ်အစွန်းရရှိဖို့မမျှော်လင့်ထားဘဲ၊ ကွန်ပြူတာနဲ့သက်ဆိုင်တဲ့ ဆက်စပ်ပစ္စည်းတွေကို ရောင်းချရာကနေ ဝင်ငွေရှာသွားမှာဖြစ်ပါတယ်လို့သိရပါတယ်။

Endless Mini ဟာ Linux စနစ်သုံးဖြစ်ပြီး storage သိုလှောင်မှု ပမာဏ 24 Gb ပါရှိကာ ARM Cortex-A ပရိုဆက်ဆာကို အသုံးပြုထားပါတယ်။

Ref: Gadgets360

 

%d bloggers like this: