ဂျာမနီ ကုမ္ပဏီက လူငါးယောက်စီး မောင်းသူမဲ့ တက္ကစီ လေယာဉ်ကို ပြသ

ဂျာမနီ ကုမ္ပဏီ တစ်ခုဖြစ်တဲ့ Lilium က လူငါးယောက်စီး ကမ္ဘာ့ ပထမဆုံး မောင်းသူမဲ့ တက္ကစီ လေယာဉ်ကို ပြသလိုက်ပါတယ်။ ဒီလအစောပိုင်းမှာ ပထမဆုံးအကြိမ် အောင်မြင်စွာ စမ်းသပ်ပျံသန်းခဲ့ပြီးပြီလို့ ကုမ္ပဏီက ပြောပါတယ်။ ခရီးရှည် ပျံသန်းတာမျိုးတော့ မဟုတ်သေးပါဘူး။ လေယာဉ်ဟာ မြေပြင်ကနေ ဝေဟင်ကို ပျံတက်ပြီး အချိန်အနည်းငယ် လေထဲမှာ ရပ်နားနေတာပါ။ ပြီးတော့ မြေပြင်ကို ပြန်လည် ဆင်းသက်ခဲ့တာ ဖြစ်ပါတယ်။

သူဟာ အီလက်ထရစ် လေယာဉ်ဖြစ်ပြီး ၆၀ မိနစ်အတွင်းမှာ ၃၀၀ ကီလိုမီတာ မောင်းနှင်နိုင်တယ်လို့ သိရပါတယ်။ အခြား ကုမ္ပဏီများကလည်း မောင်းသူမဲ့ တက္ကစီ လေယာဉ်များကို ဖန်တီးနေကြပေမယ့် လူနှစ်ယောက်သာ လိုက်ပါစီးနင်းနိုင်ပါတယ်။ Lilium ရဲ့ စီအီးအိုနဲ့ ပူးတွဲတည်ထောင်သူ Daniel Wiegand က “ လူနှစ်ယောက်ထက် ပိုပြီး ငါးယောက်အထိ စီးနင်းနိုင်ဖို့က ကျွန်တော်တို့ ရည်မှန်းချက် ဖြစ်ပါတယ်။ ဒါမှသာ ခရီးသည်များများ စီးနိုင်မှာ ဖြစ်ပါတယ်။ “ လို့ ပြောပါတယ်။

အဲဒီ လေယာဉ်ကို အီလက်ထရစ် မော်တာ ၃၆ လုံးဖြင့် မောင်းနှင်ထားပါတယ်။ မြေပြင်ကနေ ဝေဟင်၊ ဝေဟင်ကနေ မြေပြင် ဒေါင်လိုက် ပျံတက်၊ ဆင်းသက်နိုင်ပါတယ်။ တစ်ခါအားသွင်းထားရင် တစ်နာရီကြာ ပျံသန်းနိုင်ပါတယ်လို့ ကုမ္ပဏီက ပြောပါတယ်။ အခုတော့ သူ့ကို ထပ်မံစမ်းသပ်မှုများ ပြုလုပ်တော့မှာ ဖြစ်ပါတယ်။

ကုမ္ပဏီက ၂၀၂၀ ခုနှစ်မှာ သူ့ကို အမြောက်အများ ထုတ်လုပ်နိုင်မယ်လို့ ထင်ကြောင်း ပြောပါတယ်။ Airbus , Uber အပြင် ကုမ္ပဏီများစွာကလည်း မောင်းသူမဲ့ တက္ကစီ လေယာဉ်များကို ဖန်တီးနေကြပါတယ်။ ပညာရှင်များက မောင်းသူမဲ့ တက္ကစီ လေယာဉ်များဟာ ကားလမ်း ပိတ်ဆို့မှုများကို ဖြေရှင်းနိုင်ပြီး သဘာ၀ ပတ်ဝန်းကျင် ပျက်ဆီးမှုကို လျှော့ချပေးနိုင်တယ်လို့ ပြောပါတယ်။

Ref : bbc

ဂျာမနီ ကုမ္ပဏီက လူငါးယောက်စီး မောင်းသူမဲ့ တက္ကစီ လေယာဉ်ကို ပြသ

%d bloggers like this: