အမေရိကန်စစ်တပ်က ဒရုန်းတွေကို ပစ်ချမယ့် Microwave အမြှောက်ကို ဖန်တီး

အမေရိကန် စစ်တပ်က ဒရုန်းများကို ပစ်ချနိုင်တဲ့ မိုက်ကရိုဝေ့ဖ် အမြောက်ကို အသုံးပြုဖို့ စီစဉ်နေပါတယ်။ စစ်တပ်က Lockheed Martin ကနေ အဲဒီလို ပစ်ချနိုင်တဲ့ မိုက်ကရိုဝေ့ဖ် စနစ်ကို ဝယ်ယူဖို့ ရည်ရွယ်ထားတယ်လို့ ပြီးခဲ့တဲ့ သောကြာနေ့က ပြောပါတယ်။ အဲဒီ လက်နက်ကို လေယာဉ်များမှာ တပ်ဆင်နိုင်မှာ ဖြစ်ပြီး မိုက်ကရိုဝေ့ဖ် လှိုင်းများဖြင့် Fixed-Wing နဲ့ Quadcopter Drones များကို စက်ရပ်သွားအောင် ပြုလုပ်နိုင်မှာ ဖြစ်ပါတယ်။

ဗင်နီဇွဲလား သမ္မတ ဖြစ်သူ Nicolas Maduo ကို ဗုံးများ တပ်ဆင်ထားတဲ့ ဒရုန်းများဖြင့် လုပ်ကြံသတ်ဖြတ်ဖို့ ကြိုးစားမှုတစ်ရပ် ပြီးခဲ့တဲ့နှစ်က ဖြစ်ပွားခဲ့ပါတယ်။ ဗုံးများကို အဝေးထိန်းခလုတ်ကနေ ဖောက်ခွဲခဲ့တယ်လို့ သိရပါတယ်။ ဒရုန်းဟာ Hexacopter Drones များ ဖြစ်ပြီး DJI ရဲ့ Matrice 600 နဲ့ ဆင်တူတယ်လို့ သိရပါတယ်။ ဒရုန်းတစ်ခုစီမှာ C4 ယမ်း ၁ ကီလိုဂရမ်စီ ပါရှိပါတယ်လို့ ဗင်နီဇွဲလား လုံခြုံရေး အဖွဲ့က ပြောပါတယ်။ Matrice 600 ဟာ အများဆုံး အနေဖြင့် ၅.၅ ကီလိုဂရမ်ကို သယ်ဆောင်နိုင်ပါတယ်။ အဲဒီ ဖြစ်ရပ်ကြောင့် ဒရုန်းများရဲ့ အန္တရာယ်ကို ကမ္ဘာအဝန်းမှာ စိုးရိမ်မှု မြင့်တက်လာပါတယ်။ ဗင်နီဇွဲလား သမ္မတ ဖြစ်သူ Nicolas Maduo ရဲ့ ဖြစ်စဉ်မှာ လုံခြုံရေး တပ်ဖွဲ့များဟာ ရိုင်ဖယ် သေနတ်များဖြင့် ဒရုန်းများကို ပစ်ချခဲ့တာ ဖြစ်ပါတယ်။

အမေရိကန် စစ်တပ်က သုံးမယ့် Lockheed Martin ရဲ့ စနစ်ဟာ လေတပ်အတွက် ဖန်တီးပေးထားတာ ဖြစ်ပြီး Self-Protect High Energy Laser Demonstrator or SHIELD လို့ အမည်ပေးထားပါတယ်။ ဒီစနစ်ဟာ ဝင်လာတဲ့ ဒုံးကျည်များကို ဖျက်ဆီးနိုင်အောင် ဒီဇိုင်းထုတ်ထားတာ ဖြစ်ပြီး ၂၀၁၇ ခုနှစ် နိုဝင်ဘာလမှာ ဒေါ်လာ ၂၆ သန်းတန် ဒီဇိုင်းဆုကို ရရှိထားပါတယ်။

ဒရုန်းများကို နှိမ်နင်းနိုင်မယ့် နည်းစနစ်များကို တီထွင်နေကြပါတယ်။ ဒရုန်း အများစုကို ထိန်းချုပ်သူနဲ့ အဆက်အသွယ် ပြတ်အောင် ရေဒီယိုလှိုင်းများဖြင့် နှောင့်ယှက်နိုင်ပါတယ်။ အချို့နိုင်ငံများမှာ ဒရုန်းများအား တိုက်ခိုက်ဖို့ သိမ်းငှက်များအား သင်ကြားပေးထားပါတယ်။

Ref : theverge

အမေရိကန်စစ်တပ်က ဒရုန်းတွေကို ပစ်ချမယ့် Microwave အမြှောက်ကို ဖန်တီး

%d bloggers like this: