ကီးဘုတ်ကို အပြင် ဆွဲထုတ်နိုင်တဲ့ Acer Predator Helios 700 ထွက်ရှိ

Acer က မနေ့က ကျင်းပပြုလုပ်ခဲ့တဲ့ ပွဲမှာ Laptop နဲ့ PC မော်ဒယ်သစ် အများအပြားကို မိတ်ဆက်သွားခဲ့ပါတယ်။ ဒီထဲမှာ Creators တွေ Designers တွေအတွက် ရည်ရွယ်ထုတ်လုပ်ထားတဲ့ ConceptD စီးရီး အသစ်လည်း ပါဝင်ပါတယ်။ အားလုံးထဲမှာ စိတ်ဝင်စားဖို့ အကောင်းဆုံး မော်ဒယ်တခုကတော့ Acer Predator Helios 700 မော်ဒယ်ပါ။ Helios စီးရီးရဲ့ မော်ဒယ်အသစ် ဖြစ်ပါတယ်။

Intel ရဲ့ စွမ်းဆောင်ရည်မြင့် 9th Gen Core i9 Processors တွေကို အသုံးပြုထားပြီး၊ 64GB RAM နဲ့ Nvidia GeForce RTX 2080 ဂရပ်ဖစ်ကတ်တွေ ပါဝင်ပါတယ်။ မျက်နှာပြင်က 17-inch FHD IPS Display ဖြစ်ပါတယ်။ 144Hz နဲ့ 3ms response time ရှိတဲ့ G-Sync ပါ Display ဖြစ်ပါတယ်။ စပီကာ ငါးလုံးနဲ့ subwoofer တလုံးလည်း ပါဝင်ပြီး၊ 5.1 ပတ်လည်အသံပြေးစနစ် ရမှာပါ။ Killer Wi-Fi AX150 နဲ့ Killer E3000 Ethernet port တွေလည်း ထည့်သွင်းထားပါသေးတယ်။

အပေါ်က အချက်တွေ အားလုံးက Gaming Laptop ဝယ်ချင်သူတိုင်း မက်မောလောက်တဲ့ အချက်တွေပါ။ ဒါပေမယ့် တကယ့် ထူးခြားတဲ့အချက်ကတော့ ဒီ Laptop ရဲ့ “HyperDrift” ကီးဘုတ်မှာ ရှိပါတယ်။ ခလုတ်နဲ့ Trackpad တွေ ပါတဲ့ ကီးဘုတ်ကိုယ်ထည်တခုလုံးကို လက်ပ်တော့ အပြင်ဘက် ဆွဲထုတ်နိုင်ပြီး၊ trackpad အပိုင်းကို လက်တင်ဖို့ အသုံးပြုနိုင်ပါတယ်။

ဆွဲထုတ်လိုက်ရင် ကိုယ်ထည်မှာ ထည့်ထားတဲ့ ပန်ကာတွေနဲ့ အပူထုတ် ပိုက်ချောင်းတွေကို မြင်ရမှာပါ။ ကိုယ်ထည်အပေါ်ဘက်မှာ နောက်ထပ် လေဝင်ပေါက် နှစ်ပေါက်လည်း ပေါ်လာမှာ ဖြစ်ပြီး၊ ဂိမ်းဆော့တဲ့အခါ လက်ပ်တော့ရဲ့ အပူကို ပိုမို လျော့ချပေးနိုင်မှာ ဖြစ်တယ်လို့ Acer က ဆိုပါတယ်။

ကီးဘုတ်ခလုတ်တခုချင်းစီက RGB backlight နဲ့ ဖြစ်ပြီး၊ MagForce key လို့ အမည်ပေးထားပါတယ်။ Linear switches ဒီဇိုင်းနဲ့ပါ။ ပိုမိုတိကျမှု ရှိတယ်လို့ Acer က ဆိုပါတယ်။ Gaming Laptop ဆိုတဲ့အတိုင်း ချက်ချင်း Overclock လုပ်ဖို့ Turbo hotkey နဲ့ GPU, CPU အသုံးပြုမှုတွေ၊ ပန်ကာလည်နှုန်းတွေ၊ အပူချိန်တွေ ကြည့်နိုင်မယ့် Predator Sense ဆော့ဖ်ဝဲလည်း ပါဝင်မှာ ဖြစ်ပါတယ်။

Acer Predator Helios 700 ကို ဒေါ်လာ ၂,၇၀၀ ဈေးနဲ့ ဧပြီလမှာ စတင်ရောင်းချသွားမှာ ဖြစ်ပါတယ်။ အလေးချိန်ကတော့ ၉.၉ ပေါင်ရှိတာကြောင့် အပြင်သယ်သွားဖို့တော့ တော်တော်စဉ်းစားရမှာပါ။ အခုခေတ်မှာ LAN Party တွေလည်း သိပ်မဆော့ကြတော့တဲ့အတွက် လက်ပ်တော့အလေးချိန်ကတော့ Gaming သမားတွေအတွက် သိပ်ကိစ္စမရှိဘူးလို့ ထင်ပါတယ်။

Ref: PC Gamer

ကီးဘုတ်ကို အပြင် ဆွဲထုတ်နိုင်တဲ့ Acer Predator Helios 700 ထွက်ရှိ

%d bloggers like this: