Apple Music ကို လစဉ်ကြေးပေးပြီးအသုံးပြုသူပေါင်း ၁၀ သန်းအထိ ရောက်ရှိ

Apple

Apple Music ကို ထုတ်လွှင့်ပြီး ပထမဆုံးခြောက်လအတွင်းမှာပဲ လစဉ်ကြေးသွင်းပြီးအသုံးပြုသူပေါင်း ၁၀ သန်းအထိ ရောက်ရှိသွားပြီဖြစ်တယ်လို့Financial Times နေ့စဉ်သတင်းစာက ဖော်ပြလိုက်ပါတယ်။ ပြိုင်ဘက် music-streaming ဝန်ဆောင်မှုဖြစ်တဲ့ Spotify ဟာ ဒီပမာဏရောက်ဖို့အတွက်  ခြောက်နှစ်တာကြာခဲ့ပေမယ့် Apple Music ကတော့ ခြောက်လအတွင်း မှတ်ကျောက်တင်နိုင်ခဲ့တာဖြစ်ပါတယ်။

Apple Music ဝန်ဆောင်မှုကို တစ်ကမ္ဘာလုံးမှာ သုံးစွဲမှုအများဆုံးဖြစ်တဲ့ Android စနစ်မှာလည်း အသုံးပြုလို့ရအောင် Apple က ထုတ်ပေးပြီးနောက် နှစ်လမပြည့် ခင်မှာပဲ အခုလို လစဉ်ကြေးပေးသုံးစွဲသူပေါင်း ၁၀ သန်းရောက်ရှိခဲ့တာဖြစ်ပါတယ်။

အောက်တိုဘာလက Apple ရဲ့ CEO ဖြစ်သူ Tim Cook ကလည်း Apple Music ကို ဂျွန်လမှာထုတ်ခဲ့ပြီးနောက် လေးလအတွင်းမှာ တစ်လ-ဆယ်ဒေါ်လာတန် ဂီတထုတ်လွှင့်ဝန်ဆောင်မှုရယူဖို့စာရင်းပေးထားသူပေါင်း ၆.၅ သန်းကျော်ရှိနေပြီ ဖြစ်ကြောင်း ထုတ်ဖော်ပြောကြားခဲ့ပါသေးတယ်။

Apple Music နဲ့လစဉ်ကြေးတူတူပဲကျသင့်တဲ့ Spotify ကို ယခုအခါ ငွေသွင်းအသုံးပြုသူပေါင်း သန်း ၂၀ ရှိနေပြီဖြစ်ပြီး အခမဲ့ နားထောင်သူပေါင်း ၇၅ သန်းကျော်ရှိနေပါတယ်။ လန်ဒန်အခြေစိုက် ဂီတဝန်ဆောင်မှု Spotify ကို ၂၀၀၈ ခုနှစ်နှောင်းပိုင်းမှာ စတင် ထုတ်လွှင့်ခဲ့တာဖြစ်ပြီး ၂၀၁၄ အလယ်လောက်မှာ ငွေသွင်းအသုံးပြုသူ ၁၀ သန်းရောက်ရှိခဲ့တာဖြစ်ပါတယ်။

ယခုနှစ်တွေအတွင်းမှာ အွန်လိုင်းဂီတထုတ်လွှင့်ဝန်ဆောင်မှု (streaming music service) ဟာ ခေတ်စားလာခဲ့ပြီး လွန်ခဲ့တဲ့ ၂၀၁၅ ခုနှစ်က streaming ဝန်ဆောင်မှုတွေကို ဝင်ရောက်နားထောင်မှုပေါင်းဟာ အမေရိကန်ပြညိထောင်စုမှာတင် ၁၄၅ ဘီလီယံအထိရှိခဲ့ပါတယ်။

Apple ရဲ့ iTunes Store ကနေ ဝယ်ယူနားထောင်တဲ့သီချင်းတွေနဲ့၊ နားထောင်သူအကြိုက်ဂီတပုံစံအပေါ်မူတည်ပြီး Apple Music က နားထောင်သူအတွက် သီချင်းအညွှန်းတွေပေးစွမ်းနိုင်ပါတယ်။ ဒီ့အပြင်ကြိုက်နှစ်သက်ရာဂီတအမျိုးအစားကို ရွေးချယ်နားထောင်နိုင်ကာ သီချင်းအပုဒ်ရေပေါင်း သန်း ၃၀ လောက်ရှိပါတယ်။ Apple Music မှာဝန်ဆောင်မှုမှာ ရေဒီယိုလိုင်း Beats 1 နဲ့ပရိတ်သတ်တွေနဲ့အနုပညာရှင်တွေ ဆက်သွယ်နိုင်တဲ့ Connect ဆိုတဲ့ ဝန်ဆောင်မှုဆိုပြီး ဝန်ဆောင်မှုနှစ်မျိုးပါ ပါရှိပါတယ်။

Ref: cnet

%d bloggers like this: