မောင်းသူမဲ့ကား လျှို့ဝှက်ချက်တွေ ခိုးယူရန် ကြိုးပမ်းမှုကြောင့် Apple ဝန်ထမ်းတဦး တရားစွဲခံရ

ခြောက်လအတွင်းမှာ ဒုတိယအကြိမ်မြောက်အဖြစ် FBI ဟာ တရုတ်နိုင်ငံသားတဦးကို Apple ကုမ္ပဏီရဲ့ မောင်းသူမဲ့ကားပရောဂျက်ဆိုင်ရာ လျှို့ဝှက်ချက်တွေ ခိုးယူရန် ကြိုးပမ်းမှုကြောင့် တရားစွဲဆိုလိုက်ပါတယ်။

Jizhong Chen ဆိုသူ တရုတ်နိုင်ငံသား၊ Apple ဝန်ထမ်းတဦးဟာ “Project Titan” လို့ လူသိများတဲ့ Apple မောင်းသူမဲ့ကားပရောဂျက် လုပ်ငန်းခွင်မှာ ဓာတ်ပုံတွေ ရိုက်ယူနေတာကို လုပ်ဖော်ကိုင်ဖက် ဝန်ထမ်းတွေက တွေ့ရှိပြီးနောက်မှာ ကုမ္ပဏီက စတင်စုံစမ်းစစ်ဆေးခဲ့တာ ဖြစ်တယ်လို့ ယခုတပတ် အတွင်း ထုတ်ပြန်ခဲ့တဲ့ စွပ်စွဲချက်မှာ ဖော်ပြထားပါတယ်။

Chen ဟာ သူ့ကိုယ်ပိုင်ကွန်ပျူတာကို Apple နိုင်ငံတကာလုံခြုံရေးဝန်ထမ်းတွေအား ရှာဖွေခွင့် ပြုခဲ့ပါတယ်။ ကွန်ပျူတာထဲမှာတော့ Apple ရဲ့ ဉာဏမူပိုင်ခွင့်ဆိုင်ရာ ဖိုင်ပေါင်း ထောင်ကျော်ကို ရှာဖွေတွေ့ရှိခဲ့ကြပါတယ်။ Apple အဆောက်အအုံအတွင်း ရိုက်ကူးထားတဲ့ ဓာတ်ပုံပေါင်း ရာကျော်ကိုလည်း ရှာဖွေတွေ့ရှိခဲ့တယ်လို့ သိရပါတယ်။

ဒါ့အပြင် Chen ဟာ မကြာသေးမီကတင် တရုတ်အခြေစိုက် မောင်းသူမဲ့ကားကုမ္ပဏီတခုမှာ အလုပ်လျှောက်ထားခဲ့ပါသေးတယ်။ Chen ကွန်ပျူတာအတွင်းက တွေ့ရှိခဲ့တဲ့ ဓာတ်ပုံတပုံမှာ မောင်းသူမဲ့ကားအတွက် Apple က ဒီဇိုင်းထုတ်ထားတဲ့ ဝါယာကြိုးတပ်ဆင်မှုဒီဇိုင်း ပုံစံတွေပါ ပါဝင်တယ်လို့ ဆိုပါတယ်။

Chen ကိုတော့ တရုတ်နိုင်ငံကို မထွက်ခွာမီ တရက်အလိုမှာ ဖမ်းဆီးခဲ့တာပါ။ အမြင့်ဆုံးပြစ်ဒဏ်အဖြစ် ထောင်ဒဏ်ဆယ်နှစ်နဲ့ ဒဏ်ကြေး ဒေါ်လာ ၂ သိန်းခွဲထိ ပေးဆောင်ရဖို့ ရှိပါတယ်။

လွန်ခဲ့တဲ့နှစ် ဂျူလိုင်လတုန်းကလည်း Xiaolang Zhang ဆိုသူ Apple ဝန်ထမ်းဟောင်းတဦးဟာ ကုမ္ပဏီရဲ့ မောင်းသူမဲ့ကားပရောဂျက်ဆိုင်ရာ လျှို့ဝှက်အချက်အလက်တွေကို ခိုးယူမှုကြောင့် စုံစမ်းစစ်ဆေးရေးအရာရှိတွေက ဖမ်းဆီးထိန်းသိမ်းခဲ့ပါတယ်။

Ref: NBC

မောင်းသူမဲ့ကား လျှို့ဝှက်ချက်တွေ ခိုးယူရန် ကြိုးပမ်းမှုကြောင့် Apple ဝန်ထမ်းတဦး တရားစွဲခံရ

%d bloggers like this: