ဒေါ်လာ ၁၅၀ တန် စမတ်မွေ့ရာဆန်ဆာကို Apple မိတ်ဆက်

Apple ရဲ့ ပထမဆုံး Sleep Tracking device ထွက်လာပါပြီ။ အိပ်စက်မှုဆိုင်ရာ အချက်အလက်တွေကို စောင့်ကြည့်မှတ်သားပေးမယ့် ပစ္စည်းတခု ဖြစ်ပြီး၊ Beddit Sleep Monitor လို့ နာမည်ပေးထားပါတယ်။ ၂၀၁၇ ခုနှစ်တုန်းက ဝယ်ယူထားတဲ့ Beddit ကုမ္ပဏီရဲ့ မော်ဒယ်အသစ်ပါ။

Beddit 3.5 မော်ဒယ် Sleep Monior ဟာ အထူ ၂ မီလီမီတာပဲ ရှိတဲ့ စမတ်ကြိုးပြားတခု ဖြစ်ပါတယ်။ မွေ့ရာ အပေါ်၊ အိပ်ရာခင်း အောက်မှာ ထားရှိ အသုံးပြုရတာပါ။ ပါးလျနူးညံ့တဲ့ အသားနဲ့ ပြုလုပ်ထားတာကြောင့် အိပ်စက်ရတာ ခိုးလိုးခုလု ဖြစ်မနေဘဲ၊ ပုံမှန်အတိုင်း အိပ်စက်နိုင်မှာ ဖြစ်ပါတယ်။ အိပ်ရာခင်းပေါ် ထားအိပ်လည်း ရပါတယ်။

Beddit Sleep Monitor ဟာ အသုံးပြုသူရဲ့ အိပ်စက်မှု ပုံစံ (Sleep Patterns) တွေကို လေ့လာနိုင်ပြီး၊ အိပ်စက်ဖို့ အသင့်တော်ဆုံး အချိန်၊ အိပ်ရာထဖို့ အသင့်တော်ဆုံးအချိန်တွေကို အလိုအလျောက် အသိပေးနိုင်ပါတယ်။

“ တိကျသေချာတဲ့ အလိုအလျောက် Tracking စနစ်ကြောင့် ညဘက် အိပ်စက်မှု အချိန်၊ နှလုံးခုန်နှုန်း၊ အသက်ရှူနှုန်း၊ ဟောက်မှု၊ အခန်း အပူချိန်နဲ့ စိုထိုင်းဆ တို့ကို အပြည့်အစုံ ပြန်လည်သိနိုင်ပါတယ်။” လို့ Apple စတိုး စာမျက်နှာမှာ ဖော်ပြထားပါတယ်။

ကျန်းမာရေး စမတ်လက်ပတ်တွေမှာလည်း အိပ်စက်မှု တိုင်းတာနိုင်တဲ့ လုပ်ဆောင်ချက်တွေ ပါဝင်ပေမယ့်၊ Beddit ရဲ့ အားသာချက်က အိပ်ရာထဲထိ ပတ်ထားစရာ မလိုပဲ သက်တောင့်သက်သာ အိပ်စက်နိုင်တာပါ။ ပတ်ဖို့ မေ့သွားတာမျိုးလည်း မဖြစ်နိုင်ဘဲ အိပ်ရာအောက်မှာ အမြဲထားထားနိုင်ပါတယ်။ ဒါ့အပြင် ရလဒ်ပိုင်းလည်း ပိုမိုတိကျမှု ရှိမှာပါ။

Beddit ကို Apple Watch ကနေ အိပ်စက်မှုဆိုင်ရာအချက်အလက် Notifications တွေ၊ Bedtime Reminders တွေ ကြည့်နိုင်ပါတယ်။ iOS 12 နဲ့ အထက်က Health App ကနေပြီးလည်း အိပ်စက်မှုဆိုင်ရာ ဒေတာဆန်းစစ်မှုရလဒ်တွေ၊ နှလုံးခုန်နှုန်းဒေတာတွေ ကြည့်ရှု မှတ်သားထားနိုင်ပါတယ်။

Beddit Sleep Monitor ကို Apple ဝဘ်ဆိုဒ်ကနေ ၁၄၉.၉၅ ဒေါ်လာနဲ့ ဝယ်ယူရရှိနိုင်ပါပြီ။

Ref: Apple, The Verge

ဒေါ်လာ ၁၅၀ တန် စမတ်မွေ့ရာဆန်ဆာကို Apple မိတ်ဆက်

%d bloggers like this: