Snapdragon 855 ကို OnePlus 2019 ဖုန်းမှာ ပထမဆုံး အသုံးပြုသွားမည်

Qualcomm ရဲ့ Flagship Chipset အသစ် Snapdragon 855 ကို မနေ့က Hawaii မှာ ပြုလုပ်ခဲ့တဲ့ Qualcomm’s Tech Summit မှာ မိတ်ဆက်သွားခဲ့ပါပြီ။

အဆိုပါပွဲမှာ OnePlus ပရိတ်သတ်တွေ ပျော်ရမယ့် သတင်းတခုလည်း ထွက်ပေါ်ခဲ့ပါတယ်။ OnePlus ကုမ္ပဏီ CEO Pete Lau ကိုယ်တိုင် စင်ပေါ်တက် ကြေညာသွားခဲ့တာပါ။ ၂၀၁၉ ခုနှစ်ထုတ်မယ့် OnePlus ဖုန်းအသစ်ဟာ Snapdragon 855 သုံး ပထမဆုံးဖုန်း ဖြစ်လာမှာပါတဲ့။

ဒါ့အပြင် Snapdragon 855 အသစ်နဲ့ OnePlus ဖုန်းဟာ ဥရောပရဲ့ ပထမဆုံး 5G ဖုန်းလည်း ဖြစ်လာမှာပါ။ 5G နည်းပညာအတွက်ကိုတော့ U.K ဆက်သွယ်ရေးကုမ္ပဏီ EE က ကူညီပေးမှာ ဖြစ်တယ်လို့ ဆိုပါတယ်။

ယခုပွဲမတိုင်ခင်ကတည်းက Snapdragon 855 ကို OnePlus အရင်ဆုံး ရခဲ့တယ်ဆိုတဲ့ အကြောင်း ကျနော်တို့ ကြားနေခဲ့ရတာပါ။ OnePlus ဖုန်းတွေဟာ Flagship Chipset တွေကိုပဲ သုံးနေကြဆိုတော့ Snapdragon 855 ပါလာဖို့က သေချာနေတော့ ရင်ခုန်စရာ သိပ်မရှိပါဘူး။ ဒါပေမယ့် ပထမဆုံး Snapdragon 855 ဖုန်း ဖြစ်လာမှာကတော့ ရင်ခုန်စရာပါပဲ။

ဥရောပရဲ့ ပထမဆုံး 5G ဖုန်းကို OnePlus က တာဝန်ယူထားခြင်းက စိတ်ဝင်စားဖို့ ကောင်းပါတယ်။ အမေရိကန်ပြည်ထောင်စုရဲ့ 5G စမတ်ဖုန်းတွေအတွက် Verizon နဲ့ AT&T တို့ဟာ Samsung ကို အားကိုး ထားကြတာပါ။ ဘာလို့လည်းဆိုတော့ Samsung ဟာ 5G ကွန်ယက်စံနှုန်းသစ် ဖော်ဆောင်ရာမှာ အဓိက နေရာက ပါဝင်ခဲ့သူတဦးဖြစ်ပြီး၊ ဆက်သွယ်ရေးကုမ္ပဏီနှစ်ခုလုံးနဲ့လည်း ကာလရှည်ဆက်ဆံရေး ရှိခဲ့သူ ဖြစ်ပါတယ်။

OnePlus ဟာ Samsung လောက် အစဉ်အလာ မတောင့်တင်းပေမယ့် 5G Device အတွက်ကို လွန်ခဲ့တဲ့ လအနည်းငယ်ကတည်းက စတင် လုပ်ဆောင်နေတာပါ။ Twitter မှာလည်း မြန်နှုန်းမြင့် 5G လိုင်းကနေ ဖုန်းခေါ်ဆိုမှုတွေနဲ့ Tweet တွေ တင်ခဲ့ပြီးဖြစ်ကြောင်းကိုလည်း Pete Lau ရဲ့ Twitter မှာ ကြေညာခဲ့ပြီးပါပြီ။

OnePlus ရဲ့ Snapdragon 855 သုံး 5G ဖုန်းကို လာမယ့် ၂၀၁၉ ခုနှစ် အစပိုင်းလောက်မှာ မိတ်ဆက်ဖို့ ရှိတယ်လို့ သတင်းထွက်ထားပါတယ်။ MWC 2019 ပွဲ ဝန်းကျင်လောက်မှာပါ။ ဒါပေမယ့် OnePlus 6T ပြီးနောက် OnePlus 7 ဆိုတဲ့ နာမည်နဲ့ ထွက်လာဖို့တော့ မရှိကြောင်း ထုတ်ဖော် ပြောခဲ့ဖူးပါတယ်။ နာမည်က အရေးတော့ မကြီးပါဘူး။ OnePlus 6T 5G ဆိုပြီး မထွက်လာရင် ပြီးတာပါပဲ။

Ref: Engadget, 9to5 Google

Snapdragon 855 ကို OnePlus 2019 ဖုန်းမှာ ပထမဆုံး အသုံးပြုသွားမည်

%d bloggers like this: