Myanmar Idol Grand Final ပွဲစဉ်၏ SMS Voting မှ ရရှိလာသော မြန်မာကျပ် သိန်း ၃၈ဝ ကို အူရီဒူးမြန်မာနှင့် Myanmar Idol တို့မှ ပေးအပ်လှူဒါန်း

ယနေ့တွင် အူရီဒူးမြန်မာမှ Myanmar Idol ဖိုင်နယ်ပွဲစဉ် SMS Voting မှ ရရှိခဲ့သော မြန်မာငွေကျပ်သိန်း ၃၈ဝ အား လှိုင်သာယာမြို့နယ်၊ အလယ်ရွာရှိ အောင်ဇေယျာမင်းဘုန်းတော်ကြီးသင် ပညာရေးကျောင်း လူငယ်ဖွံ့ဖြိုးရေးဂေဟာသို့ Myanmar Idol အဖွဲ့ဝင်များနှင့်အတူ သွားရောက်လှူဒါန်းခဲ့ပါသည်။ ယင်းလှူဒါန်းမှုမှာ မိဘမဲ့ကလေးဂေဟာ အဆောက်အအုံ ဆောက်လုပ်ရန်နှင့် အခြားလိုအပ်သည့် စားနပ်ရိက္ခာများဖြစ်သော ဆန်အိတ်များ၊ ပဲ၊ ဆီနှင့် ဆား တစ်လစာ တို့ကို ပံ့ပိုးပေးနိုင်ခဲ့ပါသည်။

ယခုနှစ်အစောပိုင်းတွင် အူရီဒူးမြန်မာမှ Myanmar Idol Season 3 အား တရားဝင်ဆက်သွယ်ရေးမိတ်ဖက်အဖြစ် ကူညီပံ့ပိုးပေးခဲ့ပါသည်။ Myanmar Idol Grand Final အား ၂၀၁၈ခုနှစ်၊ သြဂုတ်လ၊ ၁၁ ရက်နေ့တွင် ကျင်းပခဲ့ပြီး မြန်မာတစ်နိုင်ငံလုံးရှိ ကြည့်ရှှုသူပရိသတ်များက မိမိတို့နှစ်သက်သည့်ပြိုင်ပွဲဝင်များအတွက် တစ်ခဲနက်မဲပေးခဲ့ကြပါသည်။ ဤပြိုင်ပွဲကျင်းပနေစဉ်အတွင်း ကပင် အူရီဒူးမြန်မာသည် SMS Voting မှ ရရှိလာသော ဝင်ငွေများကို ပြန်လည်လှူဒါန်းရန် ကြေညာခဲ့ခြင်း ဖြစ်သည်။

“မြန်မာနိုင်ငံနှင့် ပြည်သူလူထုဖွံ့ဖြိုးတိုးတက်ဖို့အတွက်ကို အူရီဒူးမြန်မာက အမြဲ ကူညီပံ့ပိုးပေးလျက်ရှိပါတယ်။ Myanmar Idol က မြန်မာလူငယ်တွေရဲ့ ပင်ကိုယ်အရည်အသွေး နှင့် ပါရမီတွေကို ထုတ်ဖော်ပေးနိုင်ဖို့အတွက် ကျွန်တော်တို့ပံ့ပိုးပေးနိုင်ခဲ့တဲ့ အစီအစဉ်တစ်ခု ဖြစ်ပါတယ်။ လူငယ်တွေက နိုင်ငံရဲ့အနာဂတ်ဖြစ်တာကြောင့် သူတို့ရဲ့အိမ်မက်တွေ၊ ရည်မှန်းချက်တွေကို ပြည့်ဝစေဖို့အတွက် သူတို့လေးတွေကို အခွင့်အရေးတွေပေးသင့်တယ်လို့ ကျွန်တော်တို့ ယုံကြည်ပါတယ်။ ဒီနေ့ လှူဒါန်းပွဲမှာ Myanmar Idol ပြိုင်ပွဲဝင်တွေရဲ့ တက်ကြွစွာပါဝင်ကူညီကြတာတွေနဲ့ မိဘမဲ့ကလေးငယ်တွေရဲ့ ပျော်ရွှင်မှုတွေကိုကြည့်ပြီး ကျွန်တော် တကယ့်ကိုပီတိဖြစ်ရပါတယ်။ ဒီလှူဒါန်းမှုလေးက ကျွန်တော်တို့အူရီဒူးကို သုံးစွဲနေတဲ့ပြည်သူတွေ အားလုံးဆီကပေးပို့တဲ့ Myanmar Idol ဖိုင်နယ်ပွဲစဉ် SMS Voting ကနေရရှိတာကို လှူဒါန်းတဲ့အတွက်ကြောင့် အားလုံးရဲ့အလှူ ဖြစ်ပါတယ်။” ဟု အူရီဒူးမြန်မာ၏ Chief Commercial Officer ဖြစ်သူ Mr. Alok Verma မှ ပြောကြားခဲ့ပါသည်။

ဘုန်းကြီးကျောင်းဆောင်မှာ ကျောင်းသားအားလုံးအတွက် နေရာအလုံအလောက်မရှိသောကြောင့် လူနေဆောင်အား နေ့ဘက်အချိန်အခါတွင် စာသင်ဆောင် အဖြစ်အသုံးပြုကြရပါသည်။ အောင်ဇေယျာမင်းဘုန်းတော်ကြီးသင် ပညာရေးကျောင်းတွင် မိဘမဲ့ကလေး ၉၇၀ အပါအဝင် ကျောင်းသားပေါင်း ၂၇ဝဝ ကျော်မှ ပညာသင်ကြားလျက်ရှိပါသည်။ ဤလှူဒါန်းမှုမှ မိဘမဲ့ကလေးငယ်များနေထိုင်ရန်အဆောင် ပံံ့ပိုးပေးနိုင်မည်ဖြစ်သည်။

အလှူပွဲကျင်းပနေစဉ်အတွင်းတွင် ယခုနှစ် Myanmar Idol တွင် အနိုင်ရရှိသွားသူ ဖြိုးမြတ်အောင် နှင့် ဒုတိယဆုရရှိခဲ့သူ ချမ်းမြေ့မောင်ချိုတို့အပါအဝင် မြန်မာအိုင်ဒေါ Season 3 မှ ပြိုင်ပွဲဝင်များကလည်း တေးသီချင်းများစွာဖြင့် သီဆိုဖျော်ဖြေခဲ့ပြီး ကလေးများ နှင့်အတူ ပျော်ရွှင်စွာ ဂိမ်းများကစားခဲ့ပါသည်။

Ref: Ooredoo Myanmar

Myanmar Idol Grand Final ပွဲစဉ်၏ SMS Voting မှ ရရှိလာသော မြန်မာကျပ် သိန်း ၃၈ဝ ကို အူရီဒူးမြန်မာနှင့် Myanmar Idol တို့မှ ပေးအပ်လှူဒါန်း

%d bloggers like this: