Xiaomi Mi A2 ကို ရွေးချယ်သင့်တဲ့ အချက် လေးခု

Xiaomi က Mi A2 ကို ကြေညာလိုက်ပါပြီ။ သူဟာ Android One Phone ဖြစ်တဲ့အတွက် OS Update များကို အမြန်ဆုံးရမှာပါ။ ဟာ့ဒ်ဝဲများကလည်း ပေးရတဲ့ ဈေးထက် တန်နေပါတယ်။ ရှောင်မီရဲ့ ထုံးစံအတိုင်းပါပဲ။ Xiaomi Mi A2 ကို ရွေးချယ်သင့်တဲ့ အချက် လေးခုကို အောက်မှာ လေ့လာကြည့်ပါ။

Xiaomi ရဲ့ ဟာ့ဒ်ဝဲမှာ Android One ပေါင်းစပ်မှုက လန်းပါတယ်။

ရှောင်မီက ယခင်နှစ်မှာ MIUI မပါဘဲ Android One အခြေပြု Mi A1 ကို ရောင်းချခဲ့ပါတယ်။ Mi A1 ဟာ Redmi Note 5 Series များလောက်တော့ ရောင်းအား မကောင်းခဲ့ပါဘူး။ ဒါပေမယ့် ရိုးရှင်းတဲ့ Pure Android နဲ့ ကောင်းမွန်တဲ့ဟာ့ဒ်ဝဲများကို နှစ်သက်သူများအတွက်တော့ သူဟာ အကြိုက်တွေ့စေခဲ့ပါတယ်။

Mi A2 ဟာလည်း ထိုနည်းလည်းကောင်းပါပဲ။ ဆော့ဖ်ဝဲဟာ ယခင်နှစ်ကနဲ့ ဆင်တူပါတယ်။ ဒါ့အပြင် ရှောင်မီက Mi Remote App , Mi Store , Mi Community , Xiaomi ရဲ့ File Manager များ အပါအဝင် အသစ်များကို ထပ်ဖြည့်ထားပါတယ်။ သူ့မှာ Android 8.1 Oreo ပါပြီး ထွက်တာနဲ့ Android P ကို ရမယ်လို့ ရှောင်မီက ပြောပါတယ်။

Snapdragon 660 ဟာ လက်ရှိ စွမ်းရည်သင့် Chipset များထဲမှာ အကောင်းဆုံးပါ။

ရှောင်မီဟာ ပြီးခဲ့တဲ ၁၂ လအတွင်းမှာ Snapdragon 660 ပါတဲ့ ဖုန်းများကို ရောင်းချခဲ့ပါတယ်။ ဒါပေမယ့် Mi A2 ဟာ 660 ပါတဲ့ ကမ္ဘာအဝန်းမှာ ရောင်းချမယ့် ရှောင်မီရဲ့ ပထမဆုံးဖုန်းပါ။ 660 မှာ 2.2GHz Kryo 260 Cores များ ပါပါတယ်။ Kryo Cores များရဲ့ စွမ်းရည်ဟာ Snapdragon 820 နဲ့ တူညီပါတယ်။ 660 အပြင် 6GB RAM, 128GB Storage များက အထင်ကြီးစရာဖြစ်ပြီး အဲဒီမော်ဒယ်ကို ၄၁၀ ဒေါ်လာသတ်မှတ်ထားပါတယ်။ 4GB/64GB Model ကို ၃၂၅ ဒေါ်လာ သတ်မှတ်ထားပါတယ်။

Screen ပိုရှည်တဲ့ 18:9 မျက်နှာပြင် အချိုး

Mi A2 ရဲ့ 18:9 မျက်နှာပြင်အချိုးဟာ စကရင်မှာ နေရာလွတ်များ ပိုလာစေပါတယ်။ အထက်နဲ့ အောက်ဘောင်များက ပါးလွှာတဲ့အတွက် စကရင်ကို ရှင်းလင်းစွာမြင်ရသလို ဒီဇိုင်းက လှပပါတယ်။ ၅.၉၉ လက်မ FHD+ (2160×1080) Screen ကို Gorilla Glass 5 ဖြင့် ကာကွယ်ထားပါတယ်။ သူဟာ Mi A1 ထက် စကရင် ပိုရှည်လာပြီး ပိုမို ပါးလွှာလာပါတယ်။

အဆင့်မြှင့်ထားတဲ့ ကင်မရာများ

သူ့ရဲ့ အနောက်ဘက်မှာ 12MP+20MP Dual Camera များ ပါပြီး အပို 20MP ကင်မရာဟာ ယခင်နှစ်ကလို Telephoto Lens မဟုတ်ဘဲ အလင်းရောင် နည်းပါးတဲ့ အချိန်များမှာ ဓါတ်ပုံကောင်းများ ရရှိအောင် ဖန်တီးထားပါတယ်။

ယခင်နှစ်ထုတ် OnePlus 5T မှာလို Mi A2 ဟာ ရရှိတဲ့ အလင်းရောင်အပေါ် မူတည်ပြီး သင့်တော်တဲ့ ကင်မရာကို အလိုအလျှောက် ပြောင်းပေးပါတယ်။ သင်နှစ်သက်တဲ့ ကင်မရာကိုလည်း ရွေးချယ်ရိုက်ကူးနိုင်ပါတယ်။

အရှေ့မှာလည်း အဲဒီ 20MP Camera ကိုပဲ ထည့်ထားပါတယ်။ တိကျတဲ့ Selfie များ ရရှိဖို့ Pixel Binning နည်းပညာပါပါတယ်။ AI ရဲ့ အကူအညီဖြင့် နောက်ခံမှုန်ဝါးတဲ့ Selfie များ ဖန်တီးပေးပါတယ်။ အလင်းရောင် နည်းပါးတဲ့ အချိန်များမှာ အဆင်ပြေစေဖို့ အရှေ့မှာ LED တစ်လုံး ပါပါတယ်။

လာမယ့်လများမှာ Mi A2 ကိုရောင်းချမယ်လို့ ရှောင်မီက ပြောပါတယ်။

Ref : androidcentral

unicode

Xiaomi Mi A2 ကို ရွေးချယ်သင့်တဲ့ အချက် လေးခု

%d bloggers like this: