အနာဂတ်ရဲ့ အဆင့်မြင့် သယ်ယူပို့ဆောင်ရေး ယာဉ်များ

ကမ္ဘာအဝန်းမှ ကုမ္ပဏီများ၊ ပညာရှင်များက အနာဂတ် ခရီးသွားမှုကို အဆင့်မြှင့်ပေးမယ့် နည်းပညာမြင့် ယာဉ်များကို တီထွင်နေကြပါတယ်။ အဲဒီ ယာဉ်များဟာ ခရီးသွားတဲ့ အခါမှာ အချိန်ကုန် သက်သာစေပြီး ကုန်ကျစားရိတ် နည်းပါးစေပါတယ်။ ဒါ့အပြင် လမ်းပိတ်ဆို့ခြင်း၊ သဘာ၀ ပတ်ဝန်းကျင်ကို ထိခိုက်စေတဲ့ ဓါတ်ငွေ့ထုတ်လွှတ်ခြင်းများကိုလည်း လျော့နည်းစေမှာ ဖြစ်ပါတယ်။

Hyperloop

Hyperloop သယ်ယူပို့ဆောင်ရေး စနစ်ဟာ လှိုဏ်ခေါင်းထဲကနေ Tube ဖြင့် သွားရခြင်း ဖြစ်ပြီး တစ်နာရီလျှင် မိုင် ၅၀၀ ကျော် မောင်းနှင်နိုင်ပါတယ်။ မောင်းသူမဲ့ စနစ် ဖြစ်တဲ့အတွက် အော်ပရေတာများရဲ့ အမှားများ၊ ရာသီဥတု အခြေအနေများကြောင့် နှောင့်နှေးမှုများ မဖြစ်တော့ပါဘူး။ အဲဒီနည်းပညာကို တီထွင်နေတဲ့ Startup ၂ ခုကတော့ Hyperloop One နဲ့ Arrivo တို့ ဖြစ်ကြပါတယ်။

Self-Driving Bus

မြို့တော်များမှာ လူဦးရေ ထူထပ်လာတဲ့အတွက် စိတ်ချရပြီး စွမ်းရည်မြင့်မားတဲ့ သယ်ယူပို့ဆောင်ရေး စနစ်များ လိုအပ်လာပါတယ်။ အဲဒီအတွက် ကုမ္ပဏီများက မောင်းသူမဲ့ ဘတ်စ်ကားများကို တီထွင်နေပါတယ်။ Mercedes-Benz က ဇူလိုင်လမှာ တစ်ဝက်တစ်ပျက် အလိုအလျှောက် မောင်းနှင်နိုင်တဲ့ Future Bus ကို ကြေညာလိုက်ပါတယ်။ အဲဒီဘတ်စ်ကားက မီးပွိုင့်များကို နားလည်ခြင်း၊ လှိုဏ်ခေါင်းများထဲမှာ မောင်းနှင်ခြင်း၊ လမ်းသွားလမ်းလာများကို သိရှိခြင်း စတဲ့ စွမ်းရည်များ ပိုင်ဆိုင်ပြီး အချို့အခြေအနေများမှာ အလိုအလျှောက် မောင်းနှင်နိုင်ပါတယ်။ Mercedes က သူ့ရဲ့ ဘတ်စ်ကားဟာ လူမောင်းနှင်တဲ့ ဘတ်စ်ကားများထက် လောင်စာဆီ အသုံးပြုမှုကို လျှော့ချပေးတယ်လို့ ပြောပါတယ်။

SkyTran

SkyTran လို သယ်ယူပို့ဆောင်ရေး စနစ်ဟာ နေ့စဉ် ရုံးသွားသူများအတွက် အကျိုးရှိစေပါတယ်။ သူဟာ လေယာဉ်လို ပုံသဏ္ဍာန် ဖြစ်ပြီး မြေပြင်အထက် ပေ ၂၀ ရှိ သံတန်းကို တွဲခိုပြီး သယ်ယူပို့ဆောင်ပေးပါတယ်။ တစ်နာရီလျှင် ၁၅၅ မိုင်နှုန်း မောင်းနှင်နိုင်ပြီး ကားဖြင့် ၂ နာရီကြာတဲ့ ခရီးကို ၁၀ မိနစ်ဖြင့် ပို့ဆောင်ပေးပါတယ်။ SkyTran ရဲ့ နည်းပညာမြင့် စနစ်က ခရီးသည်များ စီးနင်းတဲ့ အလေ့အထကို သိရှိပြီး လိုအပ်တဲ့ အချိန်၊ လိုအပ်တဲ့ နေရာကို အလိုအလျှောက် သွားပေးနိုင်ပါတယ်။ SkyTran ကို ၂၀၂၀ ခုနှစ်မှာ နိုင်ဂျီးရီးယားမှာ စတင် ဝန်ဆောင်မှုပေးမှာပါ။

Autonomous Passenger Drone

ဇွန်လမှာ Dubai Roads and Transportation Agency (RTA) က ဂျာမနီ ကုမ္ပဏီ Volocopter ထုတ်လုပ်ထားတဲ့ မောင်းသူမဲ့ Drone Taxi များကို ယခုနှစ်နှောင်းပိုင်းမှာ စမ်းသပ်မယ်လို့ ကြေညာခဲ့ပါတယ်။ အဲဒီ ဒရုန်းများဟာ မြေပြင်နဲ့ ဝေဟင်သို့ ဒေါင်လိုက် ပျံတက်၊ ဆင်းသက်နိုင်ပါတယ်။ မောင်းသူမဲ့ ဒရုန်းကို တီထွင်နေတဲ့ နောက်ထပ် ကုမ္ပဏီတစ်ခုမှာ တရုတ်မှ EHang ဖြစ်ပါတယ်။ EHang က ၂၀၁၆ ခုနှစ် ဇန်နဝါရီလမှာ သူ့ရဲ့ မောင်းသူမဲ့ အီလက်ထရစ် ဒရုန်းကို ပြသခဲ့ပါတယ်။ သူဟာ ၄.၉ ပေ အမြင့်ရှိပြီး ပေါင် ၄၄၀ အလေးချိန်ရှိပါတယ်။ တစ်နာရီလျှင် ၆၂ မိုင်နှုန်းဖြင့် ပျံသန်းနိုင်ပါတယ်။ အမြင့်ပေ ၁၁၀၀၀ အထိ ပျံသန်းနိုင်ပါတယ်။ ဒရုန်းကို စမတ်ဖုန်းကနေ ခေါ်ယူ စီးနင်းနိုင်မှာပါ။

Flying Car

Terrafugia အမည်ရ ကားပျံ ကုမ္ပဏီက TF-X ကို ၂၀၂၅ ခုနှစ်မှာ ပျံသန်းနိုင်ဖို့ ဖန်တီးနေပါတယ်။ TF-X ဟာ အလိုအလျှောက် ပျံသန်းနိုင်ပါတယ်။ ဘက်ထရီဖြင့် မောင်းနှင်မှာ ဖြစ်ပြီး တစ်ခါအားသွင်းထားရင် မိုင် ၅၀၀ မောင်းနှင်နိုင်ပါတယ်။ တိုယိုတာကလည်း ကားပျံကို တီထွင်ချင်နေပါတယ်။ ကုမ္ပဏီက ကားပျံကို တီထွင်နေတဲ့ Cartivator မှာ ဒေါ်လာ ၃၈၆ ၀၀၀ ကို ရင်းနှီးမြှပ်နှံထားပါတယ်။ သူ့ရဲ့ ကားပျံ အမည်ကတော့ Sky Drive ဖြစ်ပြီး ၂၀၁၉ ခုနှစ်မှာ စတင် စမ်းသပ်မှာပါ။ ကုန်း၊ လေနှစ်တန် မောင်းနှင်နိုင်တဲ့အတွက် မြေပြင်မှာ ယာဉ်ကြောပိတ်ဆို့နေချိန်မှာ ပျံသန်းနိုင်မှာ ဖြစ်ပါတယ်။

မောင်းသူမဲ့ ကား နည်းပညာဟာ အလွန် တိုးတက်လာနေပါပြီ။ ကားထုတ်လုပ်တဲ့ ကုမ္ပဏီ အများစုက မောင်းသူမဲ့ ကားများကို ၂၀၂၀ ခုနှစ်မှာ ရောင်းချဖို့ ရည်ရွယ်ထားပါတယ်။ လူသားများ ဘေးကင်းစေဖို့ မောင်းသူမဲ့ ကားများဟာ သာမာန်ကားများထက် အားသာချက်များ ရှိပါတယ်။ မောင်းသူမဲ့ ကားများဟာ နှစ်စဉ် လူသားများရဲ့ အသက် ထောင်ပေါင်းများစွာကို ကယ်တင်ပေးမယ်လို့ တွက်ချက်ထားကြပါတယ်။ စစ်တမ်းတစ်ခုက အမေရိကန်မှ ကားများအားလုံးရဲ့ ၉၀ ရာခိုင်နှုန်းဟာ မောင်းသူမဲ့ ကားများဖြစ်မယ်ဆိုရင် ကားမတော်တဆမှုများဟာ တစ်နှစ်လျှင် ၆ သန်းကနေ ၁.၃ သန်းအထိ လျော့နည်းသွားမယ်လို့ ပြောပါတယ်။

ref : businessinsider

unicode

အနာဂတ်ရဲ့ အဆင့်မြင့် သယ်ယူပို့ဆောင်ရေး ယာဉ်များ

%d bloggers like this: