Vivo NEX စမတ်ဖုန်းကို တစ်စစီဖြုတ်ကြည့်တဲ့အခါ?

ဖုန်းတစ်လုံးကို တစ်စစီဖြုတ်ကြည့်ရတဲ့ ရည်ရွယ်ချက်ကိုက ဒီဖုန်းဟာ ဘယ်လောက်ဖွင့်ရခက်လဲ ပြင်ဖို့ရောလွယ်ရဲ့လားဆိုတာကို သိနိုင်ဖို့ပါ။ ဒီလိုတစ်စစီဖြုတ်ကြည့်တဲ့အခါမျိုးမှာ ထူးထူးဆန်းဆန်းပစ္စည်းတွေဆို ပိုတောင်စိတ်ဝင်စားဖို့ကောင်းပါသေးတယ်။ ဥပမာ- Vivo NEX စမတ်ဖုန်းဆိုရင် ရိုက်မယ့်အချိန်မှ ကင်မရာလေးထွက်လာတဲ့ ပထမဆုံးဖုန်းပါ။ အခု MyFixGuide က ဒီ Vivo NEX ရဲ့ကင်မရာဘယ်လိုအလုပ်လုပ်သလဲဆိုတာသိဖို့ တစ်စစီဖြုတ်ကြည့်ရင်းကနေ အတွင်းပိုင်းမှာ နောက်ထပ်လျှို့ဝှက်ချက်တော်တော်များများကို တွေ့ခဲ့ရပါတယ်။

Vivo NEX teardown reveals many secrets

ပထမဆုံးထူးဆန်းတဲ့တစ်ချက်က ဖုန်းရဲ့နောက်ကျောဘက်ကို ကပ်ထားတဲ့ကော်တွေပျော့အောင် အပူပေးတဲ့အခါမှာ နောက်ကျောဖုံးကွာမလာဘဲ Display အရင်ကွာလာတာပါ။ နောက်ကျောဖုံးကတော့ ဓားနဲ့ကော်ထုတ်မှကွာထွက်လာတာတွေ့ရပါတယ်။ ဒီလိုမျိုးက Screen အစားထိုးပြင်ဆင်တဲ့သူတွေအတွက်တော့ အဆင်ပြေလွယ်ကူပေမယ့် အလွယ်တကူခွာလို့ရနိုင်တယ်ဆိုတာ နေရာတိုင်းမှာကောင်းတဲ့အချက်တော့မဟုတ်ပါဘူး။

Vivo ရဲ့ in-Display Fingerprint Sensor ကိုပထမဆုံးသုံးတာက Vivo X21 UD ဖုန်းတွေဖြစ်ပြီး အခုတွေ့ရတဲ့ Sensor ကတော့ X21 UD နဲ့မတူပါဘူး။ X21 UD မှာတုန်းက သတ်မှတ်ထားတဲ့နေရာလေးမှာကိုပဲနှိပ်ပြီး လော့ခ်ဖွင့်ရပေမယ့် ဒီ Vivo NEX မှာတော့ Screen ရဲ့တစ်ဝက်လုံးက Fingerprint Sensor ဖြစ်နေတဲ့အတွက် ၂ခုကတူစရာအကြောင်းလည်းမရှိပါဘူး။

NEX ရဲ့ ကင်မရာကို ထွက်လာဖို့ပြန်ဝင်သွားဖို့အတွက်ကတော့ Stepper မော်တာလေးနဲ့ထိန်းချုပ်ထားပြီး ဘေးမှာပါတဲ့ Spring (စပရင်) လေးကတော့ အဝင်အထွက်ချောမွေ့ဖို့ အထောက်အပံ့အနေနဲ့ပဲပါလာတာပါ။ စပရင်က အဓိကလုပ်သွားတာမဟုတ်ပါဘူး။ ဒီလိုဝင်လိုက်ထွက်လိုက်နဲ့ ကြာကြာခံပါ့မလားဆိုတာကတော့ အချိန်ကပဲ စကားပြောသွားပါလိမ့်မယ်။

နောက်တစ်ခုက Earpiece စပီကာမပါတဲ့အတွက် Screen ကနေ အသံထုတ်လွှတ်ပေးနိုင်တဲ့ Vibrator ပါ။ Mi Mix တွေတုန်းကနည်းပညာလိုမျိုးကိုမှ မတူညီတဲ့ပစ္စည်းတွေသုံးလိုက်တာပဲကွာသွားတာပါ။

Vivo NEX စမတ်ဖုန်းလေးက တော်တော်လေးဆန်းသစ်တီထွင်ထားတယ်လို့ပြောလို့ရပေမယ့် အရင်သုံးခဲ့တာတွေထက် ပိုဈေးကြီးတဲ့ပစ္စည်းအစိတ်အပိုင်းတွေကို သုံးထားရတဲ့အတွက် သုံးစွဲသူတွေဆီ ဈေးကြီးကြီးနဲ့ရောက်လာနိုင်ပါတယ်။ ဒါတော့ အားနည်းချက်လို့ပြောရမလားပါပဲ။ Vivo ကလည်း သူ့ရဲ့ဒီ Feature တွေကိုကူးချနိုင်မယ့်သူက အနည်းငယ်ပဲရှိနိုင်လိမ့်မယ်လို့ တစ်ထစ်ချယုံကြည်ထားပါတယ်။

Source: SlashGear

%d bloggers like this: