GitHub ကို ပိုင်ဆိုင်နိုင်တော့မယ့် Microsoft

Microsoft အနေနဲ့ GitHub ကို ဝယ်ယူပြီး ဖြစ်ကြောင်း သတင်းများအရ သိရပါတယ်။ နောက်ပြီး သဘောတူ စာချူပ်ကိုလည်း ဒီနေ့မနက် အစောပိုင်းမှာ ချူပ်ဆိုနိုင်ပါတယ်။ Software ကုမ္ပဏီကြီး တစ်ခုဖြစ်တဲ့ Microsoft ဟာ GitHub ကို ဝယ်ယူဖို့အတွက် သဘောတူညီချက် ရရှိပြီး ဖြစ်တယ်လို့ Bloomberg က ဆိုထားပါတယ်။

GitHub မှာ Project တွေကို စီမံခန့်ခွဲခြင်း၊ Code တွေကို ပြန်လည်ဆန်းစစ်ခြင်းများ ပြုလုပ်နိုင်ပါတယ်။ ဒါ့အပြင် Software များ တီထွင်ဖန်တီးဖို့အတွက် ကမ္ဘာ့အနှံ့အပြားက သန်းပေါင်းများစွာသော Developer တွေနဲ့အတူ လက်တွဲလုပ်ကိုင်နိုင်တဲ့ Development Platform တစ်ခုလည်း ဖြစ်ပါတယ်။ GitHub ဟာ Developer တွေနဲ့ ကုမ္ပဏီကြီးများက သူတို့ရဲ့ Project, Code နဲ့ စာရွက်စာတမ်းတွေကို Host လုပ်ရာကနေ စတင် ရေပန်းစားလာခဲ့တဲ့ Code Repository ဝက်ဆိုက် တစ်ခုဖြစ်ပါတယ်။

GitHub ကို အသုံးပြုနေကြတဲ့ ကုမ္ပဏီကြီးတွေထဲမှာ Google, Facebook, IBM, NASA စတဲ့ ကုမ္ပဏီကြီးများ ပါဝင်ပါတယ်။ Microsoft တောင်မှ သူရဲ့ Windows File Manager source code တွေကို GitHub မှာ Host လုပ်ထားတာပါ။ ပြီးခဲ့တဲ့ ၂၀၁၅ ခုနှစ်ကတော့ GitHub ရဲ့ တန်ဖိုးဟာ ကန်ဒေါ်လာ ၂ဘီလီယမ် တန်ကြေး ရှိပါတယ်။ အခု ၂၀၁၈ ခုနှစ်မှာတော့ Microsoft ဟာ GitHub ကို ဘယ်လောက် တန်ကြေးနဲ့ ဝယ်ယူသွားလဲဆိုတာကိုတော့ အတိအကျ မသိရသေးပါဘူး။

လက်ရှိ Microsoft ရဲ့ CEO ဖြစ်သူ Satya Nadella ဟာ CEO ရာထူးကို စတင်ထမ်းဆောင်ချိန်က စပြီး Open Source နည်းပညာဘက်ကို ဦးစားပေး ရင်းနှီးမြှပ်နှံနေတာ ဖြစ်ပါတယ်။ Microsoft ရဲ့ Open Source များကတော့ PowerShell, Visual Studio Code နဲ့ Microsoft Edge JavaScript engine တို့ ဖြစ်ပါတယ်။ Microsoft ဟာ Ubuntu ကို Windows 10 မှာ အသုံးပြုနိုင်ဖို့အတွက် Canonical နဲ့အတူ လက်တွဲလုပ်ကိုင်ခဲ့တာပါ။ ဒါ့အပြင် Mobile App Development အပိုင်းအတွက် အထောက်အကူ ဖြစ်စေရန် အလို့ငှာ Xamarin ကိုလည်း ထပ်မံ ဝယ်ယူခဲ့ပါသေးတယ်။

Microsoft ၊ GitHub အရောင်းအဝယ်ကြီးသာ တရားဝင်ဖြစ်သွားရင် Microsoft ရဲ့ GitHub ကြီးက Developer တွေအတွက် ပိုပြီး အသုံးဝင်လာမလား ဆိုတာကိုတော့ စောင့်ကြည့်ရမှာ ဖြစ်ပါတယ်။

Ref: theverge

%d bloggers like this: