နာမည်ကျော် Yahoo Games အပါအ၀င် တခြားဝန်ဆောင်မှုအများအပြားကို Yahoo ပိတ်သိမ်းမည်

Yahoo ကုမ္ပဏီဟာ Yahoo Games ၊ Yahoo LiveText နဲ့ တခြားဝန်ဆောင်မှုအများအပြားကို မကြာမီမှာ ပိတ်သိမ်းသွားတော့မှာဖြစ်ကြောင်း တနင်္ဂနွေနေ့က ကြေငြာခဲ့ပါတယ်။

ဒီလိုပြုလုပ်ရတာဟာ အခြေအနေမကောင်းတော့တဲ့ ကုမ္ပဏီရဲ့ လုပ်ငန်းလည်ပတ်မှုကို ပြန်လည်ကောင်းမွန် စေဖို့အတွက်ဖြစ်တယ်လို့ သိရပါတယ်။

Yahoo ကုမ္ပဏီဟာ ယခုဆုံးဖြတ်ချက်ကို ကုမ္ပဏီပိုင် ဆိုရှယ်မီဒီယာ Tumblr မှာ ပို့စ်တစ်ခုတင်ကာ တရားဝင်ကြေငြာခဲ့တာဖြစ်ပြီး၊ ဒီလုပ်ငန်းတွေကို ပိတ်သိမ်းပြီးနောက်မှာ ကုမ္ပဏီရဲ့ အဓိက၀န်ဆောင်မှု (၇) မျိုးကိုပဲ အားထားဆောင်ရွက်သွားမှာဖြစ်တယ်လို့ ဖော်ပြထားပါတယ်။ အဆိုပါ ၀န်ဆောင်မှု (၇)မျိုးကတော့ Yahoo Mail ၊ Yahoo Search ၊ Tumblr ၊ Yahoo News ၊ Sports ၊ Finance နဲ့ Lifestlye ကဏ္ဍတွေပဲ ဖြစ်ပါတယ်။

၁၉၉၈ ခုနှစ်ကတည်းက စတင်လွှင့်ခဲ့တဲ့ Yahoo Games ဆိုက်နဲ့ ချယ်နယ်ကို ယခုနှစ်၊ မေလ ၁၃ ရက်နေ့မှာ လုံးဝပိတ်သိမ်းသွားမှာဖြစ်ပါတယ်။ ဂိမ်းထုတ်လုပ်သူကုမ္ပဏီတွေအနေနဲ့ ဂိမ်းတွင်းဝယ်ယူမှုတွေပြုလုပ်ထားတဲ့ ပလေယာတွေကို ပြန်လည်အစားထိုးပေးမှုတွေ ပြုလုပ်ပေးသွားဖို့ကိုလည်း Yahoo အနေနဲ့ တောင်းဆိုထားတယ်လို့ ဆိုပါတယ်။

Yahoo Games အပြင် မနှစ်ကမှထုတ်ခဲ့တဲ့ Yahoo Livetext app ကိုလည်း ပိတ်သိမ်းသွားမှာဖြစ်ပြီး၊ ဒီ app ရဲ့ အဓိကဖန်ရှင်တွေကို တော့ Yahoo Messenger ထဲ ပြောင်းထည့်သွားမှာဖြစ်တယ်လို့လည်း သိရပါတယ်။

Ref: Times of India