မြန်မာနိုင်ငံ၏ ပထမဦးဆုံး Clash Royale ပြိုင်ပွဲ ကျင်းပ 

တယ်လီနောမြန်မာ က မြန်မာနိုင်ငံတွင် ပထမဆုံးသော Clash Royale (CR) ပြိုင်ပွဲအား နိုင်ငံတွင်းရှိ များစွာသော CR ဂိမ်းကစားသူများအတွက် ကျင်းပပြုလုပ်ပေးခဲ့ကြောင်းသိရသည်။

“မြန်မာနိုင်ငံမှာ ဆက်သွယ်ရေးနဲ့ အင်တာနက် အရည်အသွေးတွေ ပိုမို ကောင်းမွန်လာတာနဲ့အမျှ e-sports လို့ခေါ်တဲ့ အွန်လိုင်းဂိမ်းကစားနည်းတွေကို ကစားတဲ့ လူဦးရေကလည်း တစ်ဖြည်းဖြည်းတိုးပွားလာတာကို ကျွန်တော်တို့ တွေ့မြင်လာရ ပါတယ်။ ဒါ့အပြင် တယ်လီနော အနေနဲ့ အကောင်းမွန်ဆုံး 4G/LTE ဝန်ဆောင်မှုတွေကို နိုင်ငံတစ်ဝန်းက မြို့ကြီးတွေမှာ မကြာသေးမီက မိတ်ဆက်ခဲ့တာကြောင့် ဒီ e-sports အသိုင်းအဝန်းကလည်း ပိုမိုကျယ်ပြန့်လာမယ်လို့ မျှော်မှန်းရပါတယ်။ ပြည်တွင်းက e-sports အသိုင်းအဝန်းကို အားပေးကူညီမှု တစ်စိတ်တစ်ပိုင်းအဖြစ် ဒီလို ပြိုင်ပွဲတစ်ခုကို မြန်မာနိုင်ငံမှာ ပထမဆုံး ကျင်းပပြုလုပ်နိုင်ခဲ့တဲ့အတွက် ကျွန်တော်တို့ အနေနဲ့ အရမ်းကို ဝမ်းမြောက်မိပါတယ်။ နောက်ထပ်လည်း ဒီလို ဂိမ်းပြိုင်ပွဲတွေကို ကျင်းပပြုလုပ်သွားဖို့ အစီအစဉ်တွေ ရှိတာကြောင့် e-sports ပရိသတ်တွေအနေနဲ့ Facebook မှာ ကျွန်တော်တို့ရဲ့ ‘Telenor Game On’ နဲ့ချိတ်ဆက်ထားဖို့ တိုက်တွန်းချင်ပါတယ်” ဟု တယ်လီနော၏ ဈေးကွက်ဖော် ဆောင်ရေး အရာရှိချုပ် Josiln Myrthong ကပြောကြားခဲ့သည်။

အဆိုပါ နှစ်ရက်ကြာမြင့်သည့် ဂိမ်းပြိုင်ပွဲအား ဂျန်းရှင်းစီးတီးတွင် ဇွန်လ ၁၉ ရက်နှင့် ၂၀ ရက်များတွင် ကျင်းပပြုလုပ်ခဲ့ရာ ပြိုင်ဆိုင်မှု ပြင်းထန်ပြီး ရင်ခုန်စိတ်လှုပ်ရှားဖွယ် ပွဲစဉ်များ ကိုလည်း တွေ့မြင်ခဲ့ရသည်။ အဆိုပါ ဂိမ်းပြိုင်ပွဲအား ပြိုင်ပွဲဝင် ၄၈ ယောက် ဝင်ရောက်ယှဉ်ပြိုင်ခဲ့ပြီး ရှုံးထွက်စနစ်ဖြင့် နောက်ဆုံးဖိုင်နယ်ပွဲစဉ်အထိ ကျင်းပခဲ့ခြင်း ဖြစ်သည်။

အဆိုပါ ပြိုင်ပွဲသည် မြန်မာနိုင်ငံတွင် အကြီးမားဆုံးသော အွန်လိုင်းဂိမ်းပြိုင်ပွဲတစ်ခု ဖြစ်ခဲ့ပြီး ဆုချီးမြှင့်မှုများမှာလည်း ပိုမိုများပြားခဲ့သည်။ ပြိုင်ပွဲပြီးဆုံးချိန်တွင် စစ်ငြိမ်းစိုး (Clash Royale အမည် “VizardNs”) သည် တယ်လီနော Clash Royale ဂိမ်းပြိုင်ပွဲ၏ အနိုင်ရရှိသူ ဖြစ်ခဲ့ပြီး ပြည့်ဝန်ထက် (Clash Royale အမည် “Aizeth”) မှ ဒုတိယ၊ တင့်နိုင် (Clash Royale အမည် “TTP<3ZPP”) မှ တတိယနှင့် နိုင်လင်းထွန်း (Clash Royale အမည် “Lee Young Pho”) မှစတုတ္ထ အသီးသီး ရရှိခဲ့သည်။

ပြိုင်ပွဲတွင် cos-player များ၊ ဂိမ်းအတွင်းမှ ဇာတ်ကောင်များဖြင့် အလှဆင်ထားသော ဓာတ်ပုံရိုက်ကူးနိုင်သည့် နောက်ခံနံရံ များလည်းပါဝင်ခဲ့ပြီး လာရောက်ကြည့်ရှုသူများလည်း ပါဝင်ကစားနိုင်သည့် အစမ်းပြိုင်ပွဲများလည်း ပါဝင်ခဲ့သည်။ အဆိုပါ အခမ်းအနားအား တစ်ရက်လျှင် လူဦးရေပေါင်း ၂၀၀ ကျော်လာရောက် ကြည့်ရှုခဲ့ကြသည်။

Clash Royale သည် အခကြေးငွေပေးစရာ မလိုပဲ ကစားသမား အချင်းချင်း ယှဉ်ပြိုင်ကစားရသည့် အွန်လိုင်းကစားနည်း တစ်မျိုးဖြစ်ပြီး ဂိမ်းကစားသူများ အနေနှင့် ပွဲစဉ်တစ်ပွဲအား အနိုင်ရရှိစေရန် ယှဉ်ပြိုင်ဘက်၏ ခံတပ်များအား ဖြိုဖျက်ရသည့် ကစားနည်းဖြစ်သည်။ ပွဲစဉ်အနိုင်ရရှိပါက အနိုင်ရရှိသူသည် ဆုဖလားများ ရရှိမည် ဖြစ်ပြီး အဆိုပါ ဆုဖလားအရေအတွက် အပေါ်မူတည်၍ ကစားသမားများအား အဆင့်သတ်မှတ်ခြင်း ဖြစ်သည်။ ကစားသမားများအား ဆုဖလားအနိုင်ရရှိခြင်း သို့မဟုတ် ရှုံးနှိမ့်ခြင်း အပေါ်မူတည်၍ ယှဉ်ပြိုင်ရသည့် အဆင့်များကိုလည်း ခွဲခြားသတ်မှတ်သွားမည် ဖြစ်ကြောင်းသိရသည်။

%d bloggers like this: