Android ဗားရှင်းအပြင်၊ Windows 10 စနစ်နဲ့ပါ သီးခြားထွက်ရှိလာဖွယ်ရှိတဲ့ Xiaomi Mi 5

နောက်ဆုံးရရှိတဲ့သတင်းတွေအရ၊ Xiaomi ဟာ မကြာခင်ထွက်ရှိတော့မယ့် Mi 5 ဖုန်းကို Windows 10 မိုဘိုင်းစနစ်နဲ့ပါ သီးခြားထုတ်သွားဖွယ်ရှိတယ်လို့ သိရပါတယ်။

Windows 10 စနစ်သုံး Mi 5 ဟာ Android Mi 5 လိုပဲ အသေးစိတ်အချက်အလက်တွေ တူညီမှာဖြစ်တယ်လို့ လည်း သိရပါတယ်။ Xiaomi နဲ့ Microsoft ကုမ္ပဏီတို့အကြားမှာလည်း အရင်ကလက်တွဲလုပ်ဆောင်ခဲ့တဲ့သမိုင်းကြောင်းတွေရှိနေတာကြောင့် ယခုသတင်းတွေဟာ အမှန်ဖြစ်လာဖို့များပါတယ်။

အမေရိကန်အခြေစိုက်နည်းပညာကုမ္ပဏီ Microsoft ဟာ၂၀၁၅ ခုနှစ်မှာ Xiaomi နဲ့ပူးပေါင်းကာ Xiaomi Mi 4 အတွက် Windows 10 ROM ထုတ်ပေးခဲ့သလို၊ Xiaomi ကလည်း Windows 10 စနစ်သုံး Mi Pad 2 ဗားရှင်းတစ်မျိုးကို ထုတ်ပေးခဲ့ပါတယ်။

Xiaomi အနေနဲ့ ဖေဖော်ဝါရီလ ၂၄ ရက်နေ့၊ ၂၀၁၆ ကမ္ဘာ့မိုဘိုင်းဖုန်းညီလာခံ ကုန်စည်ပြပွဲမှာ Mi 5 စမတ်ဖုန်းကို မိတ်ဆက်သွားဖို့ရှိတယ်လို့ သိရပါတယ်။

Mi 5 မှာ နောက်ဆုံးပေါ် Qualcomm Snapdragon 820 ပရိုဆက်ဆာ အသုံးပြုသွားမှာဖြစ်တယ်လို့ ကုမ္ပဏီကအတည်ပြုပြောကြားထားပါတယ်။ အတည်မပြုရသေးတဲ့ နောက်ထပ်သတင်းတွေအရ ၅.၂ လက်မအရွယ်မျက်နှာပြင်ရှိတဲ့ Mi 5 ဖုန်းဟာ RAM 3GB ၊ internal storage 32 GB ဗားရှင်းတစ်မျိုးနဲ့ RAM 4GB ၊ storage 64 GB ဗားရှင်းတစ်မျိုးဆိုပြီး နှစ်မျိုးထွက်ရှိဖွယ်ရှိတယ်လို့ ဆိုပါတယ်။

ကမ္ဘာ့တတိယမြောက်အကြီးဆုံးမိုဘိုင်းဖုန်းထုတ်လုပ်သူကုမ္ပဏီဖြစ်လာတဲ့ Xiaomi ဟာ Apple ရဲ့ 3D Touch ဖိအားသိနည်းပညာသုံး touchscren နဲ့ ဆင်တူတဲ့၊ pressure-sensitive touchscreen တစ်မျိုးကို Mi 5 မှာ ထည့်သုံးသွားဖွယ်ရှိတယ်လို့ သတင်းတွေထွက်ပေါ်နေပါတယ်။

Ref: Gadgets 360

 

 

%d bloggers like this: