မောင်းသူမဲ့ဘတ်စ်ကားတွေကို နယ်သာလန်နိုင်ငံမှာ စတင်အသုံးပြု

လျှပ်စစ်စွမ်းအင်သုံး၊ မောင်းသူမဲ့ဘတ်စ်ကားတစ်စီးဟာ နယ်သာလန်နိုင်ငံ၊ ဝဂ်ဂနင်ဂန်မြို့ (Wageningen) မှာ ဇန်နဝါရီလ၊ ၂၈ ရက်နေ့က ပထမဆုံးပြေးဆွဲခဲ့ပါတယ်။

ဒါဟာ ကမ္ဘာမှာ ပထမဆုံးမောင်းသူမဲ့ဘတ်စ်ကားကို မြို့တွင်းခရီးလမ်းမှာ စတင်စမ်းသပ်အသုံးပြုတာဖြစ်ပြီး၊ ခရီးသည်ခြောက်ယောက် လိုက်ပါစီးနင်းခဲ့ကြပါတယ်။

ယခုမောင်းသူမဲ့လျှပ်စစ်ဘတ်စ်ကားတွေကို WEpod လို့အမည်ပေးထားပြီး၊ လာမယ့်နှစ်တွေအတွင်းမှာ Wageningen မြို့ အတွင်း ခေါက်တုံ့ခေါက်ပြန်ပြေးဆွဲဖို့အတွက် နောက်ထပ်ယာဉ်အမြောက်အများကို တပ်ဆင်သွားဦးမှာဖြစ်တယ်လို့သိရပါတယ်။

WEpod မောင်းသူမဲ့ဘတ်စ်ကားမှာ၊ လီဗာတွေ၊ စတီယာရင်တွေပါဝင်မှာမဟုတ်ဘဲ၊ အလိုအလျောက် စနစ်နဲ့ မောင်းနှင်သွားလာနိုင်မှာ ဖြစ်ပါတယ်။ ဘတ်စ်ကားတစ်စီးမှာ ခရီးသည်ခြောက်ယောက်လိုက်ပါနိုင်ပြီး၊ အလိုအလျောက်အဖွင့်အပိတ်တံခါး၊ ဘီးတပ်ကုလားထိုင်သမားတွေအတွက်ဆင်ခြေလျှောတစ်ခုတို့ ပါဝင်ပါတယ်။

လျှပ်စစ်စွမ်းအင်သုံးဘတ်စ်ကားဖြစ်တာကြောင့် ပတ်ဝန်းကျင်ညစ်ညမ်းမှုလည်းမရှိစေဘဲ၊ တစ်နာရီကို အမြန်ဆုံး ၂၅ မိုင်နှုန်းမောင်းနှင်နိုင်ပါတယ်။ ယာဉ်ရှုပ်ထွေးတဲ့လမ်းမမှာတော့ တစ်နာရီကို ၁၅.၅ မိုင်နှုန်းပဲမောင်းနှင်နိုင်အောင် ထိန်းချုပ်ထားတယ်လို့ သိရပါတယ်။

ယာဉ်မှာတပ်ဆင်ထားတဲ့ကင်မရာ၊ ရေဒါနဲ့ လေဆာအာရုံခံကိရိယာတွေကိုအသုံးပြုကာ၊ ပတ်ဝန်းကျင်အခြေအနေအချက်အလက်တွေကို ယာဉ်ကကောက်ယူမှတ်သားပြီး၊ တပါတည်းပါဝင်တဲ့ကွန်ပြုတာတွေက အဆိုပါအချက်အလက်တွေကို ပေါင်းစည်းစိစစ်ကာ၊ အလိုအလျောက်ထိန်းချုပ်မောင်းနှင်နိုင်တာဖြစ်ပါတယ်။

အကယ်၍ ယာဉ်မောင်းနှင်နေရင်း မတော်တဆရပ်တန့်သွားပါက၊ ယာဉ်ထိန်းချုပ်စင်တာမှာရှိတဲ့ အော်ပရေတာက ယာဉ်ကို လှမ်းစစ်ဆေးပြီး၊ လိုအပ်ပါက restart ပြုလုပ်ပေးမှာဖြစ်ပါတယ်။ ခရီးသည်တွေအနေနဲ့ ယာဉ်မှာပါဝင်တဲ့စက်ကနေလည်း ထိန်းချုပ်ခန်းကို လှမ်းဆက်သွယ်လို့ရပါတယ်။

ယခု WEPod ယာဉ်ကို နယ်သာလန်နိုင်ငံက Delft နည်းပညာတက္ကသိုလ်က နယ်သာလန်အစိုးရနဲ့ပူးပေါင်းတီထွင်ခဲ့တာဖြစ်ပြီး၊ ဒေါ်လာ ၃.၃ သန်းလောက်ကုန်ကျခဲ့တယ်လို့သိရပါတယ်။

Ref: DailyMail

 

%d bloggers like this: